Mikiel Anton Vassalli

Taf xejn min kien Mikiel Anton Vassalli?

Kien Malti bħalek li qatt ma ried iħalli

Lil martu f’idejn il-furbani,

lil artu f’idejn il-barrani,

għaliex kien Malti, tassew,

għaliex kien raġel, tassew,

għax kien iħobbhom, tassew.

Bil-lejl, bi nhar, jitħabat kien Vassalli,

Għax f’rasu kellu ħsieb li qatt ma jfalli,

jisbaħ jum illi l-Maltin,

ikunu ħielsa u magħqudin,

għal Malta isbaħ, tassew,

għal Malta ħielsa, tassew,

Malta Maltija, tassew.

Missirijietna qamu għal Vassalli,

għajjruh li kien ġakbin u kelli jħalli

l-art li ħabb u m’arfitux,

poplu lsier li fehmux,

għax kien imdawwal, tassew,

fost nies imdallma, tassew,

kien għadu kmieni, tassew.

Mas-slaten barranin, bla xejn mistħija,

Hu sostna l-jedd li Malta tkun Maltija,

u b’ilsienna ta’ Maltin,

riedna kollha magħqudin,

ħa nkunu poplu, tassew,

li jaħseb b’rasu, tassew,

li jfassal triqtu, tassew.

Illum għaddiet il-ħakma barranija,

ninsabu lkoll ħelsin f’Malta Maltija,

imma l-għaqda bejn xulxin,

għada nieqsa fil-Maltin,

għax għalkemm ħielsa, tassew,

m’aħniex magħquda, tassew,

m’aħniex Maltija, tassew.

Dal-lejl fil-ħolm iltqajt mal-kbir Vassalli,

li b’leħen ta’ ċanfir ġie fuqi w qalli,

“Għaliex għadkom mifrudin?

Ma tafux li sar il-ħin,

li tkunu ħielsa, tassew,

tkunu magħquda, tassew,

tkunu Maltija, tassew?